ماسك الترمس والكربوناتو لبشرة نضرة

سبتمبر 24, 2011 7 0 0

الماسك ده بيفتّح البشرة جدًّا وبيطرّيها وينعمها، وهو مناسب لكل أنواع البشرة.

المقادير:

  • ملعقة كبيرة ترمس مطحون
  • ملعقة كبيرة رز مطحون
  • ملعقة صغيرة كربوناتو
  • 3 ملاعق كبيرة مية ساخنة


الطريقة:
هنخلط الترمس والرز كويس أوي، وبعدين نحط عليهم الكربوناتو.. المكونات الجافة دي نقدر نخلطها ونخزنها في برطمان، ووقت ما نحب نعمل الماسك بناخد الكمية المناسبة ونعجنها بالمية؛ لكن ماينفعش نخزّنها وهي مخلوطة بالمية.


بعد ما نخلط المكونات الجافة دي كويس، هنحطّ عليها مقدار من المية الساخنة لعجنها، وممكن إننا نزود كمية المية؛ بحيث تكون العجينة ملمسها متوسط لا يابسة أوي ولا سايلة أوي.


لما نيجي نعجن الماسك ده هنحس إن فيه فوران بسيط، وده علشان فيه كربوناتو، ونقلّبه كويس علشان المكونات تتداخل مع بعض.



الماسك ده نقدر نستعمله على بشرة الوش، وممكن الجسم؛ بس مهم إنه يكون دافي مش سخن أوي، وطبعًا يكون الوش والجسم نظيف زي ما إحنا متعودين.


بنحطه على بشرة الوش، ونبعد عن منطقة العين ونفركه شوية، كمان بنحط منه على منطقة الجبهة، والناس اللي عندها قشور في منطقة الحواجب ممكن تحطّ منه وتعمل سنفرة للقشور دي، بعد ما نوزع الماسك ده على الوش كويس باخد الكمية الباقية، وأوزع منها على مناطق تعبيرات الوش.


من أكتر المناطق اللي بتعجز بسرعة في البشرة هي منطقة منتصف الجبهة بين الحاجبين، وعند زوايا العيون من الخارج، وعند زوايا الفم من الخارج، وهنسيب الماسك ده لمدة 15 : 20 دقيقة، وبعدين نشطف وشّنا.


بعد ما نمسح الماسك ندهن وشّنا بأي زيت مرطب؛ زي زيت اللوز، أو زيت حبة االبركة حسب عمر البشرة.
الماسك ده بيساعد على تفتيح البشرة، وإزالة الجلد الميت، وترطيبها، وبيديها نضارة، وبيطريها أوي.

Comments

comments

share TWEET PIN IT SHARE
Related Posts
Leave a reply

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: المحتوي يخضع لحقوق الملكية ، لذا ممنوع النسخ. شكرآ لتفهمكم!!