أنـــا بنــت ….. لكـــــن

سبتمبر 6, 2011 17 0 0

أنـــا بنــت ….. لكـــــن


كل مرة أمسك فيها المشط وأسرح شعري الطويل الناعم قدام المراية بيلفت انتباهي قد ايه شعري جميل وقد ايه انا جميلة وجذابة ورائعة .

أنا بنــت

كل لما تعدي من قدامي بنت زيي ولابسة فستان شفاف وبيبين مفاتنها ويغري كل اللي يبص عليها بفتكر دايما جسمي وحلاوته في الفستان اللي كنت لابساه امبارح في البيت.

لكــــــــــــــــن ….

لكن انا بنت مسلمة حافظة آية الحجاب ، عارفه كويس اوي ان جسمي لازم يتستر وشعري لازم يتغطي ، لازم الحجاب يغطي رقبتي ، لازم العباية تغطي جسمي .. أعجابي بنفسي وبجمالي مش هيكون سبب أبداً اني مش اطيع ربي واستجيب للي أمرني بيه ودعاني ليه رسولي محمد صلي الله عليه وسلم.

أنا بنــت

كل مرة أخرج من الكلية بتاعتي وأشوف زميلتي وصاحبها اللي مستنيها عشان يتمشوا سوا ويعيشوا لحظات رومانسية جميلة وغير وقلبي يرتعش لما افتكر الحب وقد أيه هو جميل وافتكر وحدتي واني لوحدي من غير حد يحبني زيها.

لكــــــــــــــــن ….

لكن انا بنت مسلمة وهفضل دايما وفيه لجوزي وعارفه انه جاي عشاني انا ، وربنا يحميني ويخليني واثقة من ده اوي وهفضل مستنياه عشان اكون عشانه زي ما علمني القرآن الكريم.

أنا بنــت

ونفسي لو اخرج وأروح رحلة مع اصحابي والعب واتنطط وارقص زي ما كله بيعمل.

أنا بنــت

نفسي لو اروح فرح صاحبتي واسيب جسمي يحس بحريته علي الموسيقي العالية ويبصلي الكل وهو مبسوط ويصقفوا عشاني واحس بحلاوتي في عنيهم.

لكــــــــــــــــن ….

أنا بنت مسلمة وارفض الاختلاط المحرم اللي الرحلات والحاجات دي معموله عشانه بس وعارفه كويس خطورته عليا وقد ايه هشيل ذنوب كتيرة .

أنا بنــت

بحب الحياة واحب اني احس بنفسي وبوجودي.

لكــــــــــــــــن ….

أنا بنت مسلمة وعارفة معني وجودي وعارفه انه مرتبط بالتزامي ، عارفه إن ربنا كرمني بالحجاب وخلاني مصونه ، ربنا خايف عليا من كل عين مبتخافوش .

أنا البنت المسلمة اللي هتعيش دايماً مسلمة ، اللي هتعيش حياتها اللي عايزاها في بيتها مع عيلتها وجوزها ولما تفكر تخرج هيفضل ربنا سبحانه وتعالي حاميها والحجاب صاينها ومخليها أميرة في الأرض.

المصدر

Comments

comments

share TWEET PIN IT SHARE
Leave a reply

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

error: المحتوي يخضع لحقوق الملكية ، لذا ممنوع النسخ. شكرآ لتفهمكم!!